2023-04-12 16:10:49
Çin-Tayvan gərginliyindən sonra Pekin rəhbərliyinin aprelin 16-da Tayvanın şimalındakı hava məkanını 27 dəqiqə müddətinə bağlayacağı bildirilib. Tayvanın Nəqliyyat və Rabitə Nazirliyi Pekin hökumətinin qərarına etiraz edib.
Tayvan Nəqliyyat və Rabitə Nazirliyi Pekin rəhbərliyinin bu qadağanı ilk olaraq 16-18 aprel tarixləri arasında 3 gün tətbiq etmək istədiyini, lakin Tayvandan gələn reaksiyalardan sonra bunun 27 dəqiqəyə endirildiyini bildirib.
Tayvan Milli Müdafiə Nazirliyi (MND) də məsələni yaxından izlədiyini açıqladı və uçuşa qadağa zonasının Tayvanın təxminən 85 dəniz mili şimalında, ölkənin Hava Hücumundan Müdafiə Tanıma Zonasında (ADIZ) yerləşdiyini açıqladı.
Ötən həftə Tayvan lideri Tsai İnq-ven Kaliforniyada ABŞ Nümayəndələr Palatasının sədri Kevin Makkarti ilə görüşüb və bu görüşə kəskin reaksiya verən Pekin rəhbərliyi Tayvan ətrafında hərbi təlimlərini artırıb.
Keçən il ABŞ Nümayəndələr Palatasının keçmiş sədri Nensi Pelosinin Tayvana səfərindən sonra oxşar siyasət yürüdən Pekin administrasiyası son dövrlərdə Tayvana yaxın sularda tez-tez təlimlər keçirir.
Tərcümə“24 SAAT”