Raketin vurduğu binanın dağıntıları arasından 1 nəfərin cansız cəsədi tapılıb. Partlayışın gücü ilə iki mərtəbəli məktəbin qarşısında böyük çuxur əmələ gəlib. Məktəbin direktor müavini İrena Siden dağıntılara işarə edərək, “Barbar qoşunu bunu etdi” dedi.
Rusiya ötən gün Ukraynanın bir çox bölgəsində enerji infrastrukturlarını hədəf alan raketlər atıb. Ukrayna hakimiyyəti enerji infrastrukturlarının, o cümlədən su elektrik bəndlərinin vurulduğunu, elektrik, istilik və su təchizatının dayandırıldığını açıqlayıb.
Dünənki hücumlarda 13 nəfər yaralanıb və Kiyevdə yaşayanların 80 faizinin su təchizatından məhrum olduğu bildirilib. Xarkov qubernatoru Oleh Synehubov açıqlamasında bildirib ki, hücumlardan sonra Ukraynanın ikinci böyük şəhəri olan Xarkov şəhərinin təxminən 50 min sakini də daxil olmaqla 140 minə yaxın insan işıqsız qalıb.
Rusiya prezidenti Putin Rusiyanın Krım sahillərində pilotsuz uçuş aparatları ilə Qara dəniz donanmasına hücumuna cavab olaraq Ukraynanın infrastrukturları hədəf alan raketlərlə hücuma keçdiyini və Qara dəniz taxıl ixracı ilə bağlı razılaşmaları dayandırdığını bildirib. Mövzu ilə bağlı Kiyev ittihamları rədd edib və taxıl dəhlizindən hərbi məqsədlər üçün istifadə etmədiklərini bəyan edib.
Tərcümə“24 SAAT”
